قادر وكريم

بلغني أيها العمدة السعيد.. ذو الرأي الرشيد.. والحكم السديد.. والعطف الشديد.. أن الشيخ عطا ربنا يزيده ستر وغطا.. ناوي يفرح الناس.. بعدما خدنا الكأس.. وبعدما حدوته «عصام الحضري» خلصت خلاص.. قرر الشيخ عطا يفكر شوية في الناس وناوي يوزع بطاقات التموين.. علي كل الناس اللي محتاجين.. من غير تعب ولا طلوع عين.. وح توصلهم البطاقات لحد بيوتهم وهما قاعدين.. وكل فرد له بدل البطاقة بطاقتين.. وقال كمان إن حضرة العمدة فرحان قوي ومبسوط من الشعب..
علشان الحكاية حكاية حب.. والحب ده نابع من القلب.. وأنك يا حضرة العمدة الكبير.. بتحبنا كتير.. وربنا يعينك علينا.. دا احنا شعب ما يعجبناش العجب ولا الصيام في رجب.. عشان كده عايزينك يا حضرة العمدة تضمن لنا الشيخ عطا.. وتخليه يصرف لنا بطاقات التموين بسرعة.. لاحسن ندعي عليه دعوة تغرقه في الترعة.. قادر يا كريم.